Të zbrazëta janë shumica e ueb-faqeve të ministrive të Qeverisë së Kosovës në hapësirat e zëvendësministrave.
Katër muaj pas formimit të qeverisë nga PDK-ja dhe LDK-ja, bashkë me Listën Serbe, nuk është arritur të emërohen zëvendësministrat e tyre, raporton KTV.
Në Ministrinë e Arsimit, Infrastrukturës, Shëndetësisë dhe të Punëve të Brendshme nuk është emëruar asnjë zëvendësministër, ndërsa në të tjera ministri janë se paku një në secilën.
Qeveria e Kosovës nuk i quan këto vonesa në kompletim të kabinetit qeveritar, por kujdes në përzgjedhjen e emrave që do të mund të caktohen varësisht prej ministrive, transmeton koha.net.
Për shoqërinë civile kjo tregon se këto parti qeverinë e shohin si mundësi punësimi për bashkëpartiakë e jo për të kryer punë.
Në përgjithësi, koalicioni quhet i brishtë e Mustafa – kryeministër i pafuqishëm.
Qeveria e Kosovës ka 20 ministri, ndërkaq ishte paralajmëruar se zëvendësministra do të ketë më shumë se 40, megjithatë zyrtarë të saj nuk kanë numër definitiv. Shtetet fqinje si Shqipëria e Maqedonia kanë më pak. E para 19, ndërkaq Maqedonia ka 15 ministri. Si Shqipëria, ashtu edhe Maqedonia, kanë numër më të madh të popullsisë se Kosova.