Posti i presidentit dhe gjykata speciale thellojnë përçarjen
Zgjedhjet në LDK mund ta ndërrojnë kursin
Njohësit e çështjeve politike e juridike janë të mendimit se partnerët politikë të koalicionit PDK e LDK nuk kanë besim ndaj njëri-tjetrit, ngase ata janë më shumë të interesuar që t’i bëjnë ndërskamca njëri- tjetrit, sesa që të angazhohen dhe të punojnë për interesat e Kosovës. Ky koalicion vështirë do ta presë zgjedhjen e presidentit, sipas marrëveshjes së nënshkruar të këtyre partive
Koalicioni i madh i dy subjekteve kryesore politike, PDK dhe LDK, i cili u ndërtua pas plot 6 muaj krize institucionale, pavarësisht zotimit të LDK-së se nuk do të bashkëqeveriste asnjëherë me PDKnë, ka gjasa reale që të rrezikohet së funksionuari në mandatin e plotë, fillimisht për shkak të përplasjeve për pozitën e presidentit, por edhe nga testi i parë i humbjes së funksionalitetit në rast dështimi të sigurimit të votave të mjaftueshme për votimin e gjykatës speciale.
Të dyja këto agjenda që gjenden para koalicionit PDKLDK, nëse u shtohet edhe ndonjë e papritur që mund të ndodhë në zgjedhjet brendapartiake në LDK, sipas analistëve politikë, mund ta bëjnë që jetëgjatësia e koalicionit të marrë fund hiç më larg se në pranverën e vitit që vjen, atëherë kur presidentes Jahjgaga i përfundon mandati dhe Kuvendi duhet të zgjedhë një president të ri të Republikës së Kosovës, e që sipas marrëveshjes kontratë në mes të PDK dhe LDK, është i caktuar të jetë Hashim Thaçi../kosova sot/