Nënshkrimi i marrëveshjes në mes të Kosovës dhe Serbisë në Bruksel për krijimin e Asociacionit të Komunave me shumicë serbe është pritur me kundërshtime, por edhe me vlerësime ndryshe.
Jo të gjithë i “lexojnë” njësoj pikat e marrëveshjes së publikuar nga Brukseli.
Opozita dhe disa përfaqësues të shoqërisë civile, mendojnë se me këtë marrëveshje është bërë “bosnjëzimi i Kosovës”. Por ka edhe reagime të tjera që lexojnë ndryshe pikat e marrëveshjes, sipas të cilëve me Asociacionin nuk rrezikohet sovraniteti i Kosovës.
Më e ashpra ishte Lëvizja “Vetëvendosje”, e cila këtë veprim të Qeverisë së Kosovës e ka quajtur si “tradhti”.
Por anash nuk kanë mbetur as Aleanca për Ardhmërinë e Kosovës dhe “Nisma” të cilat kanë thënë se me këtë marrëveshje është cenuar integriteti territorial i vendit.
Ndërkohë që zgjidhjen e vetme për të parandaluar këtë marrëveshje i shohin protestat, qoftë edhe të dhunshme për rrëzimin e Qeverisë.
Kurse analistët politikë janë të ndarë rreth qëndrimeve të tyre për Asociacionin./Zëri/