Nuk është e rastësishme që asnjë zyrtar i lartë në Kosovë, për të cilin dihet publikisht se si ka qenë nga ana ekonomike pak vite më parë dhe se si në pak kohë është bërë milioner, nuk janë zhvilluar hetime, dhe në këtë mënyrë për dënim nuk mund të imagjinohet. Gjithashtu, hetimet nuk janë zhvilluar, ose është vepruar sikur po kryhen hetime për raste të skandalit të privatizimeve të ndërmarrjeve të ndryshme, ku dyshohet se janë përfshirë njerëz të politikës. Kjo po ndodh se qendra ku kryhen hetimet, pra në polici, kontrollohet nga politika.
Të paktën ky është vlerësimi i juristëve, sipas të cilëve, policët u japin llogari komandantëve të tyre, këta të fundit drejtorit, i cili i raporton ministrit të Brendshëm për të vijuar më pas tek kryeministri. Sipas kësaj lidhje, vendoset kush do të hetohet apo jo dhe se në çfarë rastesh duhet të manipulohen apo të fshihen provat. Më herët me kodin e vjetër penal ka qenë parashikuar policia gjyqësore, e cila do të ishte në urdhrat e Prokurorisë, por në fakt ky sektor nuk funksionoi asnjëherë dhe për më tepër në Kodin e ri penal as nuk u mor parasysh./Kosova sot/