Opozitarët thonë se për ndryshime rrënjësore duhet të shkojë Qeveria aktuale dhe të dalë një Qeveri tjetër nga zgjedhjet e lira. Sipas analistëve, me ndryshmet e paralajmëruara do të thellohet degradimi i vendit
Pas zgjedhjes së kreut të PDK-së, Hashim Thaçi, në pozitën e presidentit të vendit, dhe në pritje të marrjes së detyrës zyrtare, partnerët e koalicionit qeverisës PDK-LDK kanë filluar të trumbetojnë se janë duke bërë përpjekje dhe plane serioze për riformatimin e Qeverisë aktuale, të dikastereve të ndryshme ministrore, me qëllim të fuqizimit dhe përmirësimit të qeverisjes për interesin publik.
Derisa ndryshimet në Qeveri nuk kanë ndodhur akoma, komentet dhe pritjet nga opozita, analistët politikë dhe shoqëria civile nuk janë aspak shpresëdhënëse. Ekziston bindja e plotë se këto ndryshime do të bëhen vetëm si një kozmetikë, ngase në Qeveri po mbeten përsëri njerëzit e njëjtë.
Opozita e bashkuar konsideron se këto ndryshme në pritje nuk do të kenë kurrfarë efekti pozitiv në përmirësim të qeverisjes në vend, sepse nga ato nuk do të dalë asnjë risi në qeverisjen e vendit me një mentalitet dhe program tjetër, por vetëm sa do të realizohet edhe një episod i ri i ndryshimeve, që janë pjesë e pazarit të koalicionit qeverisës. Opozita thotë se për ndryshime rrënjësore duhet të shkojë Qeveria aktuale dhe të dalë një Qeveri tjetër nga zgjedhjet e lira. /Kosova Sot/