Ura e Fshenjtë është ndërtuar mbi kanionin e Drinit të Bardhë dhe është e gjatë 70 metra. Thellësia prej harkut deri te shtrati i ujit është 30 m. Ndër të tjera ura, apo më saktësisht rrethina e saj shërben edhe si pushimore verore ku ngrihen çadrat e qytetarëve nga anë të ndryshme të Kosovës. Po ashtu rreth saj ka shtëpi që shërbejnë për kalimin e ditëve të verës. Në grykën e lumit para se të kalon urën gjenden dy shkëmbinjtë të njohur me emrin “Shkëmbi i Skënderbeut” dhe “Shkëmbi i Shqiponjës”. Ky emërtim vjen nga figurat e vizatuara në shkëmbit përkatës. Figura e Skënderbeut është vizatuar në shkëmb në vitin 1968 nga Mexhid Yvejsi me rastin e 500-vjetorit të vdekjes së Gjergjit.
Ndërsa shkëmbi më i lartë i rrethinës, i cili e kalon edhe lartësinë e urës thirret “Shkëmbi i Talionit” i pagëzuar sipas nofkës së kërcyesit të parë nga kjo maje në lum, Ali Talioni. Kurse historia e legjendës së Urës së Fshejtë është e njohur kur mjeshtrit ndërtonin ditën e ajo rrënohej natën, kurse aty u varros një grua e gjallë pasi kunata e saj i bëri një dredhi. Ura e Fshejtë ka shumë legjenda dhe forma të tregimit.
Si vend i besimit Edhe sot e kësaj dite në këtë Urë të Fshejtë njerëzit kanë lidhur fatet e ndryshme. Sipas shumë banorëve të Përdrinisë ka shumë familje që ende besojnë se vizita e kësaj ure të sjell fat. Plaka Hamide Berisha shprehet se dikur në Urë të Fshejtë ka pasur një ujë burimi që në Përdrini nuset apo gratë kur lindnin fëmijë dhe kishin fëmijë për gji shkonin atje.
“Kur ju humbte qumështi shkonin atje merrnin ujë për të pirë dhe befasisht gjiri atyre grave u vinte. Ka pasur raste kur në disa shtëpi nuk lindnin djem dhe burrat e shtëpisë duhet të mblidheshin bashkë me prindërit e vajzës dhe merrnin një kurban (dash) dhe e prisnin aty, e përgatisnin dhe pastaj ajo nuse pritej të lindte djalë”, shprehet Berisha. Këto besime ende vazhdojnë të jenë prezente edhe në ditët e sotme. Bile tani shkohet ende atje tek ai krua ku uji është i bardhë dhe marrin ujë për të shëruar sëmundje e syve../kosova sot/