Me shpalosjen e rezultateve të punës njëvjeçare të punës, Drejtoria Rajonale e Policisë në Prizren e ka përmbyll vitin 2016.
Në një takim të organizuar në Drejtorinë Rajonale të Policisë në Prizren, në përmbyllje të vitit 2016, Drejtori Nexhmi Krasniqi, duke iu drejtuar të pranishmëve në mesin e të cilëve ishin edhe kryetari i Komunës së Prizrenit Prof.Dr. Ramadan Muja, kryeprokurori i Prokurorisë Themelore në Prizren Sylë Hoxha, Kryetari i Gjykatës Themelore në Prizren, Ymer Hoxha dhe mysafirë nga Shqipëria dhe nga KFOR-i, tha se objektivat e përcaktuara në fillim të vitit janë realizuar me sukses.
Duke i shpalosur faktet nga puna njëvjeçare Krasniqi tha se synimet janë arritur përmes objektivave të përcaktuara e që ishin metodologjia e re e policimit në Bashkësi dhe policia e udhëhequr nga Inteligjenca. Trende të suksesshme në Drejtorinë Rajonale në Prizren, sipas tij, janë shënuar në shtimin e aktivitetit policor, ku u veçuan patrullimet e shtuara me automjete, patrullimet në këmbë, pikat e kontrollit, asistimet dhe arrestimet. “Në të gjitha këto aktivitete ka trende pozitive nga 3 deri në 5 përqind” tha Krasniqi.
Drejtori i Policisë Rajonale Nexhmi Krasniqi, tha më tej se në Rajonin e Prizrenit krimi ka rënie për 4 përqind, duke u nisur nga numri i vrasjeve që ka rënë për 57 përqind deri te vjedhjet e rënda që kanë rënie për 16 përqind dhe grabitjet të cilat gjithashtu kanë rënie.
Gjithashtu një sukses i Policisë në Prizren u cilësua edhe bashkëveprimi me Gjykatat, Kuvendet Komunale, KEDS-in dhe AKP-në.
Policia ka asistuar në 1368 raste. “Në bazë të këtij raporti mund ta konkludojmë se objektivat e përcaktuara janë realizuar mbi 80 përqind” tha Krasniqi. Punën e policisë e vlerësuan me nota pozitive edhe kryetari i Komunës së Prizrenit, Prof.Dr. Ramadan Muja, kryeprokurori i Prokurorisë Themelore në Prizren Sylë Hoxha dhe kryetari i Gjykatës Themelore në Prizren Ymer Hoxha. /newskosova.com/