Me “double-double” prej 25 pikëve e 10 kërcimeve, Artin Gashi udhëhoqi Golden Eagle Yllin drejt fitores ndaj Rahovecit (99:86) vikendin e shkuar.
Këto statistika bënë që Gashi të shpallet edhe lojtari më i mirë i xhiros së 16-të në IP Superligën e Kosovës në basketboll, shkruan Koha Ditore.
Në përgjithësi, statistikat e Gashit këtë edicion janë impresionuese, pasi po luan me mesatare prej 17 pikëve, 7 asistimeve dhe 2 kërcimeve për ndeshje. 69.7 për qind është i saktë në gjuajtjet për dy pikë, kurse për tri pikë ka saktësi 40.9 për qind.
Gashi këtë edicion ka përgjegjësi shtesë te skuadra e Yllit. Përveç që është kapiten, synim e ka edhe ndonjë trofe me ekipin nga Suhareka. E, sipas tij, këtë edicion është e mundur.
Ai para fillimit të këtij edicioni është kthyer tek Ylli pas një aventure nëpër disa skuadra të Kosovës. Por dallimi është se te Ylli ai ka shpërthyer në krahasim me ekipet e tjera.