Bledi Shkëmbi nuk do të shkarkohet.
Ai, ka marrë mbështetje nga Kryesia e Lirisë në Prizren
“Nuk është e vërtetë që Kryesia po mendon shkarkimin e Bledi Shkëmbit, siç thuhet në këto mjete, që prodhojnë dezinformata dhe që janë të dëmshme për opinionin publik dhe as që i bëjnë nder vetë sajuesve të këtyre lajmeve”, thuhet në reagimin e Lirisë së Prizrenit
“Ne, jemi të kënaqur me punën profesionale të Shkëmbit”.
Kryesia e Lirisë ka analizuar edhe ndeshjen e 1/8 së DigitAlb Kupës së Kosovës.
“Konstatimi unik ishte se djelmoshat e drejtuar nga Bledi Shkëmbi dhanë gjithçka nga vetja, duke rrezikuar edhe shëndetin në ato kushte mizore”.
“Tereni i pa përshtatshëm, i mbuluar me baltë e ujë, që më shumë ngjasonte në një kënetë, pamundësoi që në shprehje të vinte kualiteti”.
“Kryesia e KF Liria, reagon fuqishëm edhe ndaj disa portaleve sikur edhe disa TV lokale, që në mungesë të temave, po mundohen të ‘shpikin’ tema me gënjeshtra”, shkruan PrizrenPress.
Kryesia e Lirisë, vlerëson se bashkëpunimi me Komunën e Prizrenit është i mirë.
“Marrëdhëniet me Komunën janë në nivelin e duhur, ku kryetari Mytaher Haksuka, ka pritur drejtues të KF Liria, sikurse edhe zyrtarë të DKRS-së në Prizren, që kanë premtuar vazhdimin e përkrahjes sikurse edhe në të kaluarën, që Komuna ka dhënë për Lirinë”./PrizrenPress.com/