Portieri legjendar italian nuk e ka nisur në mënyrën më të mirë të mundshme aventurën te Paris Saint-Germain.
Gianluigi Buffon pësoi tre gola në sfidën ndaj Arsenalit dhe në njërin prej tyre ishte vetë fajtor.
Menjëherë pas ndeshjes miqësore, trajneri i PSG, Thomas Tuchel hodhi dyshime mbi faktin se Buffon do të luajë titullar, transmeton ksp. Ai tha se vendimi nuk është marrë akoma.
“Konkurrenca për këtë rol është shumë e fortë, por do të vendos shumë shpejt se cili do të jetë titullari. Do ta bëj kur të tre portierët që kam në dispozicion të jenë 100% në formë”, u shpreh trajneri gjerman.
I menjëhershëm ishte edhe reagimi i Buffonit, i cili theksoi se e mirëpret sfidën dhe se do të punojë maksimalisht për të merituar fanellën e titullarit të skuadrës franceze.
“Në 24 vite askush nuk më ka dhuruar asgjë. Kam qenë gjithmonë titullar sepse kam punuar shumë dhe sepse e kam merituar. Erdha te PSG i bindur se kam ende mundësi të meritoj fanellën e titullarit”, deklaroi Buffon.