Policia e Kosovës përmes një komunikate për media bën të ditur se katër persona, në dy raste të ndryshme, të dyshuar për vjedhje janë arrestuar në Prizren.
“Në dy raste të ndryshme, sot janë arrestuar katër persona, të gjithë në cilësi të dyshuarve për raste të grabitjeve. Rasti i parë ka të bëjë me të dyshuarin S. M., i cili ishte në arrati që nga data 19 maj dhe dyshohet se ka qenë i përfshirë në grabitje të armatosur që pati në ndodhur vonë në mbrëmje në fshatin Gjinoc”, thuhet në komunikatë.
Më tutje thuhet se, “sot është arrestuar nga Policia e Prizrenit edhe një grup i të miturve prej tre të dyshuarve që kanë kryer grabitje në qytetin e Prizrenit. Ky grup është marrë me grabitjen e çantave të krahut, telefonave dhe portofolave”.
Gjatë bastisjes së shtëpive të këtij grupi, tek njëri prej tyre është gjetur dhe sekuestruar një sasi e drogës e llojit marihuanë.
Hetuesit policorë po punojnë që të ndriçojnë edhe raste tjera që ka mundur t’i kryejë ky grup. Pritet që prokurori i shtetit të merr vendim për procedim të rastit.