I akuzuari për veprën penale “heqje apo dëmtim i vulave zyrtare ose i shenjave”, Eqerem Spahiu, është deklaruar i pafajshëm në seancën fillestare të së premtes në Gjykatën Themelore në Gjakovë, dega në Rahovec.
Pas leximit të aktakuzës nga prokurori Enis Gashi, i akuzuari ka mohuar fajësinë, raporton “Betimi për Drejtësi”.
“Nuk është e vërtetë që unë i kam hek shiritat e inspeksionit, e vërteta është se unë e kam ndërprerë punën, ndërsa me insistimin e pronarit të objektit Selim Gashi, unë kamë vazhduar punën, pasi që djali i pronarit Arlindi i ka hequr shiritat”, tha i akuzuari
Gjykatësi Ilir Rashkaj, pas deklarimit të palës mbi fajësinë, seancën e radhës e ka caktuar më 19 dhjetor 2018, në ora 11:00.
Ndryshe, Prokuroria Themelore në Gjakovë, më 20 qershor 2016, ka ngritur aktakuzë për heqjen apo dëmtimin e vulave zyrtare apo i shenjave, ndaj të akuzuarit Eqrem Spahiu.
Sipas prokurorisë, i akuzuari më 12 qershor 2015, në fshatin Fortesë të Rahovecit, rreth orës 08:30, si ekzekutues i punimeve heqë shiritat e vendosur nga inspektorët komunalë të ndërtimtarisë.
Në aktakuzë thuhet se shiritat ishin vendosur nga inspektorët për pezullimin e menjëhershëm të punimeve ndërtimore në objektin hotelier, pronë e investitorit Burim Selim Gashi, mirëpo shiritat i kanë hequr dhe kanë vazhduar punimet.