Kryetari i Komunës së Rahovecit, Smajl Latifi, në një postim në llogarinë e tij në rrjetin social Facebook, ka shkruar se ka mbetur i tronditur nga aksidenti në fshatin Bërnjak ku tre qytetarë mbetën të vdekur e që menjëherë pasi që e mori lajmin doli në vendin e ngjarjes.
“U trondita nga lajmi i para pak orëve, ku në një aksident të rëndë trafiku në Bërnjak kanë humbur jetën 3 qytetarë, kurse 3 janë lënduar! Sapo mësova për rastin dola në vendin e ngjarjes, për të kuptuar nga afër se çfarë ka ndodhur” shkroi Latifi.
Ai ka shprehur ngushëllime familjarëve dhe i ka bërë thirrje qytetarëve të kenë kujdes në komunikacion në këtë kohë të fluksit të makinave në rrugë.
“Dua t’i ngushëllojë sinqerisht familjarët e viktimave, ndërsa të lënduarve ju uroj shërim të shpejtë. Njëkohësisht, lus qytetarët që të kenë shumë kujdes në komunikacion, sidomos tani që është rritur fluksi i automjeteve në rrugë” shkroi ai.