Me futjen e Komunës së Prizrenit në karantinë janë izoluar edhe banorët e Komunës se Dragashit, ani pse këtu nuk është asnjë rast pozitiv me COVID-19.
Por, kjo komunë nuk ka rrugë tjetër alternative për të lëvizur pos përmes Prizrenit.
19 fshatra të banuar me shqiptarë, e 18 të banuar me goranë e boshnjakë në Dragash, duhet të qarkullojnë vetëm me leje, raporton KOHA.
Qytetarët mirëpresin këto masa si formë pozitive për menaxhim të situatës me koronavirus, por izolimi po u shkakton mjaft vështirësi.
Përfaqësuesi i banorëve të Dragashit thotë se me gjithë vështirësitë që ky izolim po ua sjell janë duke u ndihmuar familjet që kanë nevojë.
Në Komunë tregojnë se situata, megjithatë, është e menaxhueshme.
Sipas nënkryetarit të Dragashit, Selami Sahitit, janë identifikuar rreth 70 persona të ardhur nga vende të tjera në këtë komunë, e që të gjithë, sipas tij, kanë qëndruar në vetizolim.
Komuna fqinje e Dragashit, Prizreni, deri tani ka mbi 35 raste të konfirmuara me COVID-19.