Real Madridi nuk e shpërdoroi mundësinë për të marrë kreun e La Ligas, pas barazimit 0-0 të Barcelonës në fushën e Sevillas.
“Los Blancos” fituan mbrëmjen e djeshme 1-2 në “Anoeta” përballë Real Sociedadit dhe me bilanc më të mirë ndaj “bluagranave” në sfidat direkte e zhvendosin rivalin e përjetshëm në vendin e dytë.
Pjesa e parë u mbyll me rrjeta të paprekura, por ekuilibri në rezultat nuk do të zgjaste më shumë.
Në fillimin të pjesës së dytë gjyqtari sinjalizoi për 11-metërsh, vendim që u konfirmua edhe nga sistemi VAR.
Ekzekutimin e saj e mori përsipër Sergio Ramos, që nuk gaboi përballë Remiros.
Në të 70-ën Karim Benzema lëvizi bukur në zonë, duke gjetur hapësirën e nevojshme për të goditur, me topin që përfundoi në rrjetë, 0-2.
Sociedadi, pas shumë përpjekjesh arriti të shkurtonte diferencën në 2-1 me Merinos, por ky finalizim nuk u mjaftoi vendësve për të shmangur humbjen, që ishte e dyta radhazi në La Liga.
