Në takimin e sotshëm të reformës zgjedhore, nuk kanë marrë pjesë lideri i LDK-së, Isa Mustafa, dhe ai i AAK-së, Ramush Haradinaj.
LDK-ja në këtë takim ka qenë e përfaqësuar nga sekretari i përgjithshëm i këtij subjekti politik, Ismet Beqiri, Vjosa Osmani dhe Arben Gashi. Kurse, AAK-në e kanë përfaqësuar dy nënkryetarët – Blerim Shala dhe Ardian Gjini.
Të pranishëm në këtë takim ishin edhe ambasadorët e vendeve të Quintit dhe përfaqësuesi i BE-së në Kosovë, Samuel Zhbogar.
Një zyrtar që ishte i pranishëm në këtë takim, i ka thënë “Epokës së re” në kushte anonimiteti se përfaqësuesit ndërkombëtarë janë habitur me mos prezencën e Mustafës dhe Haradinajt, pasi nikoqir i këtij takimi ishte ambasadori britanik në Kosovës, Ian Cliff.
“Ambasadorët e shteteve të Quintit dhe Samuel Zhbogar nuk u ndien mirë me mos prezencën e liderit të LDK-së dhe të AAK-së. Opozita, siç po shihet, nuk është e gatshme për përshpejtimin e reformës zgjedhore”, ka thënë ky zyrtar.
Në këtë takim ishin prezentë kryetari i PDK-së, Hashim Thaçi, kryetari i AKR-së, Behgjet Pacolli dhe ai i SLS-së, Slobodan Petrovic.