Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen raste ku viktima zakonisht janë gratë dhe vajzat që përjetojnë dhune psikike e fizike nga prindërit, partnerët dhe anëtarët tjerë të familjes, raporton Gazeta Sinjali.
Një rast i dhunës në familje ka ndodhur mbrëmë në fshatin Medvec të Prizrenit, ku një burrë dyshohet se ka përdorur gjuhë të papërshtatshme kundrejt vajzës së tij.
Sinjali mëson se i dyshuari nën ndikim të alkoolit ka fyer e ofenduar 21-vjeçaren me fjalë të rënda, duke e quajtur me terme denigruese si k*rvë që del pa dijeninë e tij.
Përballë kësaj situate, vajza ka denoncuar rastin në Polici, ku para hetuesve policorë është shprehur se nuk ndihet e sigurt të jetojë me babain e saj.
Si rezultat i denoncimit, njësitë policore kanë arrestuar të dyshuarin i cili është shoqëruar në stacion policor për intervistim. Ai po ashtu i është nënshtruar testit të alkoolit, ku ka rezultuar në gjendje të dehur.
Pas përfundimit të procedurave policore, Prokurori ka urdhëruar që ndaj tij të nisin hetimet nën dyshimet për kryerjen e veprës penale ‘Dhunë në familje’.
/GazetaSinjali/