Koalicioni vendor i organizatave jo-qeveritare kosovare për vëzhgimin e zgjedhjeve “Demokracia në Veprim” ka raportuar për dy incidente në hapjen e vendvotimeve në Prizren.
Sipas komunikatës së DnV, kryesuesit e vendvotimeve në dy raste kanë mohuar qasjen në informata për vëzhguesit e këtij koalicioni.
“Është raportuar për dy raste kur vëzhguesve të DnV-së në komunën e Prizrenit u është mohuar qasja në informata nga kryesuesit e vendvotimeve, përkatësisht në Qendrën e Votimit “Abdyl Frashëri” 2002/05 dhe Qendrën e Votimit “Motrat Qirazi” 2003/07”, thuhet në njoftim.
Bazuar në sqarimet e DnV-së, vëzhguesit në këto raste kanë kërkuar informata lidhur me numrin e votuesve në vendvotimet përkatëse.
Për ditën e zgjedhjeve parlamentare të Kosovës, DnV në nivel vendi ka akredituar 500 vëzhgues statikë të cilët po mbështeten nga 50 ekipe mobile dhe dhjetëra vullnetarë në Qendrën e Thirrjeve.
