Kryeministri në detyrë i Kosovës, Albin Kurti, së bashku ministrin në detyrë të Shëndetësisë, Arben Vitia, ka vizituar ushtruesin e detyrës së drejtorit të QKUK-së, Osman Hajdari, si dhe drejtorin e ShSKUK-së, Elvir Azizi.
Kurti në një shkrim në ‘Facebook’, ka shkruar se krimi i organizuar dhe aksionet me elemente terroriste nuk i trembin drejtorët tanë e dëshmon deklarata publike e djeshme e Osman Hajdarit, u.d. i drejtorit të QKUK-së.
Ai u shpreh se dënon ashpër sulmin ndaj drejtorit Hajdari, teksa bëri thirrje organeve të rendit e të drejtësisë që sa më parë të zbardhin rastin dhe kryesit e këtij akti kriminal të sillen para përgjegjësisë.
“Në çdo institucion publik kemi ndërmarrë reforma të thella që në thelb kanë mbrojtjen e interesit publik e shërbime më të mira për qytetarët. Këto reforma kanë prekur interesa të ngushta të klaneve të ndryshme të instaluara për më shumë se 20 vjet në çdo pore të institucioneve tona. Por, akte të tilla jo vetëm që nuk na ndalin, por na bëjnë edhe më këmbëngulës në punët e mira që po bëjmë”, ka shkruar Kurti.
