Të mërkurën është bërë varrimi i mbetjeve mortore të dyzetë e gjashtë personave, të cilat u janë dorëzuar familjeve të tyre gjatë kësaj jave nga Departamenti i Mjekësisë Ligjore (DML).
Mbetjet mortore të njëzet e shtatë personave, siç njofton EULEX, u janë dorëzuar familjeve Berisha nga Suhareka të hënën (24 mars), ndërsa të nesërmen familjet nga fshati Krusha e Vogël i kanë pranuar mbetjet mortore të nëntëmbëdhjetë personave.
“Personat e pagjetur të familjeve Berisha dhe Bytyqi ishin gjetur në vitin 2001 në Batajnicë, Serbi, kurse personat e pagjetur nga Krusha e Vogël ishin gjetur në vitin 2003 në Shirokë, Suharekë, si dhe në vitin 2012 gjatë një operacioni në terren të DML-së në poligonin e qitjes në Lubizhdë në komunën e Prizrenit”, thuhet në njoftimin e zyrës për informim e EULEX-it.
Deri më sot, DML i ka kryer 445 operacione në terren, gjatë të cilave janë gjetur 247 persona, kurse mbetjet mortore të 361 personave u janë dorëzuar familjeve të tyre, nga të cilët 269 ishin në listën e personave të pagjetur.