Inspektorati Policor i Kosovës ka hetuar 328 punonjës të Policisë së Kosovës, për shkelje të ndryshme, gjatë detyrës.Në raportin vjetor të IPK-së, që do të paraqitet të martën para Komisionit për Punë të Brendshme, Siguri dhe Mbikëqyrje të FSK-së, thuhet se nga shqyrtimi i ankesave që kanë pasur, hetimi ka rezultuar me 16 të arrestuar nga IPK-ja, 46 rekomandime për Drejtorin e PK-së për suspendim.
Në raportin që e ka KosovaPress, thuhet se gjatë periudhës së raportimit Policia e Kosovës ka pasur 8458 punonjës, ndërsa në total 328 punonjës kanë qenë subjekt i hetimit të inspektoratit.
“Të paraqitur në formë përqindje kjo i bie që 4 % i tërë punonjësve të PK-së ishin nën hetim. Në vitin 2013 janë 33 punonjës të PK-së më pak të hetuar se sa në vitin 2012”, thuhet në raport.
Ndërsa, masat dhe rekomandimet e dhëna nga IPK-ja gjatë vitit 2013 të cilat kanë ardhur si kërkesa dhe nevoja gjatë zhvillimit të hetimeve kanë da lë këto të dhëna.
“16 arrestime nga ana e IPK-së, 46 rekomandime për suspendime nga Kryeshefi Ekzekutiv i Inspektoratit Policor të Kosovës drejtuar Drejtorit të Përgjithshëm të Policisë së Kosovës dhe 2 rekomandime për transfer nga Kryeshefi Ekzekutiv i Inspektoratit Policor të Kosovës drejtuar Drejtorit të Përgjithshëm të Policisë së Kosovës”, thuhet me tej në raport.
Në raport më tutje thuhet se për periudhën janar-dhjetor 2013, përmes 1064 ankuesve IPK-ja ka pranuar gjithsej 1050 ankesa lidhur me supozimet për shkelje disiplinore/penale të zyrtarëve policorë. Sipas raportit, këto ankesa kanë shkuar nga qytetarët nga të gjitha komunitetet etnike dhe gjinore në forma të ndryshme ashtu siç parashihet me mekanizmat e ankimimit të mbështetura me akte ligjore dhe nënligjore. Kurse, nga 1064 ankues konsolidohen në 1050 ankesa të cilat IPK-ja i ka trajtuar.
Pesë rastet më të shpeshta që IPK-ja ka hetuar gjatë vitit 2013 ishin, 43 raste rrezikim i trafikut publik, 38 raste lëndimi i lehtë trupor, 35 raste keqpërdorimi i pozitës apo autoritetit zyrtar, 30 raste keqtrajtim gjatë ushtrimit të detyrës zyrtare dhe 20 raste kanosje.
IPK-ja gjatë vitit 2013 kishte hetuar edhe një numër të zyrtarëve policor që ishin të graduar.
“Gjatë vitit 2013 IPK-ja ka hetuar 39 zyrtar të graduar, prej tyre 1 kolonel , 2 nënkolonel, 3 kapiten, 11 toger, 22 rreshter, 273 zyrtarë policor si dhe 16 punonjësve nga stafi civil”, thuhet në raport.
Ndërsa, sipas statistikave të IPK-së, ankuesit janë nga këto etnitete, 1012 shqiptarë apo 95 për qind e ankuesve, 38 serbë apo 4 për qind e ankuesve, 11 boshnjak apo 1 për qind e ankuesve dhe 1 turk, 1 RAE dhe 1 goran.
