Departamenti amerikan i Mbrojtjes thotë se ka mundësi të heqë dorë nga ideja e një misioni për evakuimin e refugjatëve nga një mal në Irakun verior, pasi sipas vlerësimit të gjendjes, në atë zonë ka shumë më pak refugjatë sesa ç’mendohej më parë.
Sekretari amerikan i mbrojtjes Chuck Hagel, duke folur me gazetarët dje në mbrëmje, përmendi efektivitetin e goditjeve amerikane kundër grupit të Shtetit Islamik dhe ndihmave humanitare nga ajri, si faktorë që kanë kontribuar në përmirësimin e situatës në Malin Sinjar, raporton VOA.
Kurdët e Irakut dhe pakica të tjera, u strehuan në Malin Sinjar për t’i shpëtuar mizorive vdekjeprurëse të militantëve në rajonet e gjera pranë kufirit sirian.
Shtetet e Bashkuara dërguan trupa në atë zonë këtë javë për të shqyrtuar mundësinë e ndihmës humanitare. Zoti Hagel tha dje se pavarësisht nga vlerësimi pozitiv, përpjekja e Shteteve të Bashkuara nuk është kompletuar.