Separatistët pro-rusë rrëzuan sot një avion luftarak ukrainas Mig-29 në rajonin lindor të vendit të shkatërruar nga lufta.
Një zëdhënës ushtarak tha se piloti u hodh me parashutë dhe u shpëtua në zonën e Luhanskut.
Ndërkohë, siç njofton agjencia franceze e lajmeve, zyrtarët e Komitetit Ndërkombëtar të Kryqit të Kuq kanë arritur në Rusi në afërsi të kufirit me Ukrainën për të filluar inspektimin e një autokolone të madhe ruse me ndihma, e cila përgatitet për të hyrë në Ukrainë.
Një zëdhënëse e Kryqit të Kuq i tha agjencisë së lajmeve se të shtunën u arrit një marrëveshje për mënyrën se si do të inspektohet autokolona. Ajo tha se nuk besonte që inspektimet të fillonin sot. Megjithatë, zyrtarët ukrainas thonë se kanë filluar kontrollin e autokolonës së ndihmave.