Duke mos mundur të gjejë partnerë për koalicion, PDK vazhdon t’i vardiset LDK-së, duke i premtuar partneritet, respektim të ndërsjellë e çka jo tjetër, por LDK që dikur e kishte përjetuar bashkëqeverisjen me PDK-në është betonuar në koalicionin LDK-AAK-NIMSA.
Kreu i Gjilanit, Lutfi Haziri, që është njeri me ndikim në LDK, shpesh është deklaruar për zhvillimet politike në vend, bile
edhe për idenë që po ripërsëritet nga zëra të PDK-së se koalicioni më i mirë, më i qëndrueshëm dhe më me interes për vendin është ai në mes të PDK-së dhe të LDK-së.
Haziri, që ka folur për portalet lokale në Gjilan e ka përjashtuar mundësinë e përafrimit të LDK-së me PDK-në, duke thënë se “kjo punë e ka pasur”.
“PDK-ja përherë e ka parë shpëtimin në LDK. PDK ka qejf me qenë me LDK. Por kësaj here nuk i “dhezë” më. PDK duhet të mësohet me qenë opozitë se aty e ka vendin. Blloku nuk do të thyhet dhe se do të jetë ai që do të qeverisë me vendin, duke e lenë PDK-në në opozitë”, ka thënë Lutfi Haziri, kryetar i Gjilanit.