Gazetari dhe publicisti, Adriatik Kelmendi, e ka postuar në Facebook një fotografi, ku rreth sofrave me ushqim e pije, janë grumbulluar në një aheng politikanë subjektesh të ndryshme politike, madje edhe të atyre partive që betohen se nuk do t’i bashkojë kulaçi i pushtetit.
“E tash krijohen institucionet, identifikoni personat në foto”, ka shkruar Kelmendi në Facebook, i cili edhe vetë ishte pjesë e ndejës.
Në ballë të “oxhakut” është anëtari i Kryesisë së AAK-së, Besnik Tahiri, i cili ishte edhe nikoqir i kësaj ndeje.
Aty shihet edhe zv/ministri i Punëve të Jashtme, Petrit Selimi (PDK), ministri në detyrë i Tregtisë dhe Industrisë, Bernard Nikaj (AKR), pastaj këshilltari i kryeministrit në detyrë, Ardian Arifaj, Ylli Hoxha, Ardian Gjini etj.
Ndërsa, për disponim të mirë të mysafirëve përreth sofrave të begatshme me ushqim dhe pije, janë përkujdesur rapsodët.
Edhe, zv/ministri i Punëve të Jashtme, Petrit Selimi në Twitter ka postuar një foto bashkë me Ardian Gjinin dhe Ylli Hoxhën, të cilën e shoqëroi me komentin: Koalicioni i dashurisë ndaj mbretëreshës.