500px Global Photo Walk është një ngjarje joformale që organizohet në gjithë botën me 6 shtator. Me këtë datë tubohen fotografë nëpër qytete të ndryshme për të bërë fotografi sipas një teme të parapërcaktuar.
Kjo ngjarje nuk ka karakter garues dhe shërben ekskluzivisht për promovimin e qyteteve të caktuara në nivel global. Duke përdorur hash tag të caktuar, mundësohet që vizitorë nga të gjitha kontinentet t’i shohin fotografitë e postuara dhe me këtë të njoftohen mbi vlerat kulturore dhe civilizuese të atyre qyteteve dhe njëkohësisht u mundësohet fotografëve afirmim në nivel ndërkombëtar, transmeton KultPlus.
Në Prizren ngjarja vjen sot po ashtu me fotografët të cilët do të duhen të punojnë mbi tri tema: Kalaja e Prizrenit, monumentet historike nëpër qytet dhe pjesa urbane e qytetit.
Në garë mund të marrë pjesë kushdo që e ka pasion fotografinë, pa marrë parasysh a është amator apo profesionist, apo çfarë pajisje fotografike posedon. Organizatorët nuk ofrojnë përkrahje financiare për mbarëvajtjen e këtij takimi, mirëpo do të mundësojnë që opinioni botëror të jetë i informuar nëpërmes rrjetave sociale.
Secili pjesëmarrës duhet të hapë llogari të veten në www.500px.com Me përfundimin e takimit, fotografitë e zgjedhura secili pjesëmarrës duhet t’i postojë në llogarinë e vet në www.500px.com