Presidenti amerikan Barack Obama njoftoi aplikimin e sanksioneve të reja kundër Rusisë në sektorin e financave, energjisë dhe mbrojtjes, si përgjigje ndaj veprimeve të paligjshme të Moskës në Ukrainë.
“Sot, ne do të bashkohemi me BE-në duke shpallur intensifikimin e sanksioneve të reja”, deklaroi Obama në një komunikatë, duke theksuar se detajet e këtyre masave të reja do të shpallen nesër.
Por ai u shpreh i gatshëm t’i heqë këto sanksione nëse Rusia i përmbahet plotësisht angazhimeve të saj pas marrëveshjes së armëpushimit të arritur të premten e kaluar mes Ukrainës dhe forcave proruse.
“Nëse në të kundërt Rusia vazhdon të veprojë duke shkelur ligjet ndërkombëtare, çmimi për t’u paguar do të vazhdojë të rritet për Moskën”, paralajmëroi presidenti amerikan.
Disa orë më parë, BE-ja shpalli se do të përforcojë sanksionet e saj kundër Rusisë, duke shkaktuar zemërimin e Moskës, që akuzon BE-në se po dëmton procesin e zgjidhjes paqësore të krizës.