Sesioni i 13-të i Parlamentit Kulturor Evropian sivjet mbahet në Prishtinë, në fillim të muajit tetor.
Në një draft agjendë që e ka KultPlus në këtë Parlament i cili mbahet në kryeqytet do të kenë fjalimet e tyre dy ministrat e kulturës, Memli Krasniqi nga vendi dhe Mirela Kumbaro nga Shqipëria, ndërsa nuk do të mungojnë edhe përfaqësuesit ndërkombëtarë të fushave specifike kulturore.
Roli i diplomacionë kulturore dhe krijimi i imazhit kombëtar është një prej debateve që pritet të mbahen në kuadër të parlamentit, e që sjell Kumbaron përkrah Erna Hennicot Schoepges, ish ministre e kulturës në Luksemburg. Popullismi dhe ekstremizmi në Evropë po ashtu do të diskutohet nga Marie Louise von Plessen nga Gjermania dhe Nils Erik nga Finlanda.
Debatet kulturore do të fokusohen edhe në mënyrën e të bërit art, ngritjen e fondeve kulturore dhe angazhimin e qyteteve sekondare në krijimin e një fryme kulturore.
Roli i kulturës në barazinë gjinore apo edhe kriza ukrainase dhe ndikimi i saj në Evropë dhe artin evropian po ashtu janë tema diskutimi.
Eliza Hoxha, Mary Miller, Kateryna Botanova e të tjerë pjesëmarrës pritet të paraqiten në këto debate.
Parlamenti Kulturor Evropian është nën ombrellën e Këshillit të Evropës, dhe është formuar në vitin 2001. Ka 165 artistë anëtarë dhe personalitete kulturore nga 43 shtete. Sesionet e kaluara të Parlamentit janë mbajtur në Edinburg, Athinë, Berlin, Grac, Gjenovë e vende tjera.