Një aksion i policisë i zhvilluar në disa fshatra të Prizrenit ka rezultuar me arrestimin e hajnave që po kërkoheshin për një rast të grabitjes.
bëhet fjalë për grabitjen e armatosur të kryer në marketin ‘Lanti-B’ në rrugën ‘Besim Shala’, në Prizren.
Pas më shumë se një muaji në arrati, policia ka arritur t’ua vë prangat katër të dyshuarve që terrorizuan punëtorët e këtij biznesi dhe vodhën shumën e të hollave prej 600 eurove.
Burimet e Sinjalit brenda Prokurorisë kanë bërë me dije se arrestimi i të dyshuarve erdhi pas bastisjeve që u kryen në lagjen ‘Bajram Curri’, Dobrusht dhe Vlashnje, gjatë ditës së premte.
Përveç që u kapën të dyshuarit, Hetimet Rajonale kanë gjetur prova që dëshmojnë përfshirjen e tyre në rast.
Gjatë aksionit që u zhvillua në këto lokacione, Sinjali mëson se u gjetën veshmbathjet e të dyshuarve, të cilat i kanë pasur të veshura gjatë kryerjes së grabitjes dhe ndërlidhen me pamjet e siguruara për rastin.
Por si ndodhi rasti?
Më 13 qershor ka publikuar detajet e grabitjes. Ngjarja kishte ndodhur më 12 qershor rreth orës 21:30 në marketin ‘Lanti-B’ në rrugën ‘Besim Shala’ në Prizren.
Punëtorët e marketit kanë qenë duke punuar kur janë ballafaquar me të dyshuarit e maskuar, të cilët nën kërcënimin e armës kanë arritur që të marrin rreth 600 euro nga arka.
Pasi kryen këtë veprim, hajnat kishin ikur nga vendi i ngjarjes për një drejtim të panjohur.