Gjykata e Apelit do të vendosë për një prej kontesteve pronësore më të njohura në vend.
Rasti i Shyhrete Berishës kundër Arben e Xhelal Berishës, ka mbërritur në këtë Gjykatë, pas ankesës që të paditurit kanë paraqitur në fillim të nëntorit, raporton KTV.
Aktgjykimi i Gjykatës Themelore në Prizren – Dega në Suharekë, kishte konstatuar se Shyhrete Berishës i takon gjysma e shtëpisë, si dhe gjysma e dy ngastrave kadastrale.
Si rezultat i numrit të madh të lëndëve, Gjykata e Apelit ende nuk ia ka caktuar këtë lëndë ndonjërit prej gjyqtarëve të saj.
KTV-ja ka kontaktuar me njërin prej të paditurve, Xhelal Berishën, por i njëjti nuk është përgjigjur, ndërsa më vonë, avokatja e tij Shpresa Rexhepi, interesimin e KTV-së për këtë rast, e ka konsideruar si presion mbi organet e drejtësisë.
Gjykata Themelore e Prizrenit – dega në Suharekë, aktgjykimin lidhur me këtë rast për të cilin në vazhdimësi ka raportuar KTV-ja, e ka nxjerrë në muajin maj.
Berisha, një prej të mbijetuarve të masakrës ndaj familjes Berisha, ballafaqohet me procedura ligjore të paktën që nga viti 2000, kur nuk i ishte lejuar hyrja në shtëpi.