Kryetari i Partisë Konservatore të Kosovës, Munir Basha ka akuzuar “Qeverin Muja” për dëmtim të buxhetit të Komunës së Prizrenit.
Sipas tij, buxheti komunal është dëmtuar nga qeveria aktual që në fillim kur ka marrë vendim t’i themelojë 12 drejtori komunale.
“Kryetari aktual nuk ka bërë gjë tjetër, pos që ka mundësuar keqpërdorimin e mjeteve dhe taksave te paguara nga qytetarët e Komunës sonë”, tha Basha.
Ai tregoi se gjatë mandatit të tij, “Qeveria Muja”, ka shpenzuar mbi 300 mijë euro vetëm për pagat e 12 drejtorëve.“Natyrisht se në shumën prej 300 mijë eurosh nuk përfshihen edhe shpenzimet tjera luksoze të këtyre drejtorëve, shpenzime këto që janë marramendëse, sikurse janë drekat, darkat, shpenzimet e udhëtimit, derivatet e naftës, shpenzimet e telefonit etj”, tha Basha.
Sipas tij, themelimi i një numri të madh të drejtorive nuk e ka përmirësuar efikasitetin e qeverisjes dhe aspak nuk është në përputhje me kërkesat reale të qytetarëve dhe vetë Komunës së Prizrenit. “Përkundrazi, pos keqpërdorimit enorm të mjeteve, kjo ka shkaktuar edhe rritje të pashembullt të burokracisë në Komunë, ka krijuar tollovi në ndarjen e kompetencave dhe shumë probleme tjera me të cilat për çdo ditë ballafaqohen qyetetarët e Komunës së Prizrenit”, theksoi ai.
Ai premton se Partia Konservatore do të ofrojë një model tjetër të qeverisjes në Prizren.
“Qeverisja nën drejtimin e kandidatit të Partisë Konservatore për kryetar të Komunës së Prizrenit, Beni Kizolli, do të bazohet në ndalimin e plotë të çfarëdolloji të keqpërdorimit të buxhetit të komunës, dhe se do të bazohet në qeverisje pa korrupsion dhe pa burokraci dhe në qeverisje profesionale”, tha Basha.
Ai tha se “Qeveria Kizolli” do të ketë 7 drejtori komunale të cilat do të ngërthejnë të gjitha kompetencat komunale. “Vetëm nga reduktimi i numrit të drejtorive, ‘Qeveria Kizolli’do të kursejë rreth 150 mijë euro nga buxheti i Komunës”, tha ai.
Në “Qeverinë Kizolli”, sipas tij, sektori i Inspektorateve do të jetë nën menaxhimin e drejtpërdrejtë të kryetarit të Komunës. “Ose mund të propozohet që secili sektor i inspektoratit të jetë përgjegjësi e drejtorisë përkatëse-por jo drejtori e veçantë”, tregoi ai.
Sipas tij, modeli i kësaj qeverie Qeverisë do të sigurojë efikasitet, kualitet dhe transparencë në punën e zyrtarëve komunal. “’Qeveria Kizolli’ do të jetë shembull i qeverisjes së mirë dhe të ndershme për të gjitha komunat e Kosovës “, u shpreh ai. /PrizrenPress.com/
Struktura e “Qeverisë Kizolli” do të përbëhet nga:
• Drejtoria e Administratës;
• Drejtoria për Inspektoriat
• Drejtoria për Arsim, Kulturë, Rini dhe Sport;
• Drejtoria për Shëndetësi dhe Mirëqenie Sociale;
• Drejtoria për Urbanizëm, Gjeodezi dhe Kadastër;
• Drejtoria për Shërbime Publike dhe Emergjencë;
• Drejtoria për Zhvillim Ekonomik ,Buxhet dhe Financa, Bujqësi dhe Turizëm.