Zafir Berisha kryetar i Nisma në Prizren dhe deputet i Kuvenit të Kosovës, në Info Magazine të Klan Kosovës ka thënë se vdekja e një tre vjeçareje nga shembja e një objekti të vjetër shënon kulmin e neglizhencës të institucioneve dhe komunës së Prizrenit, njofton Klan Kosova.
“Ky është kulmuniacioni i neglizhencës së institucioneve dhe komunë së Prizrenit për qendrën historike. Komuna jo që nuk ka bë asgjë, por është edhe përgjegjëse pa ja hequr fajin edhe ministrisë së Kulturës. Unë kam menduar se rregullimi i asaj rruge do bëhej moti dhe do ishte atraksion për turistët”.
Ai ka deklaruar se nuk pret që pas këtij rasti, kryetari i komunës së Prizrenit, Ramadan Muja, të dorëhiqet, ndërsa ka kërkuar që faji të adresohet dhe të mos mbetet jetim.
“Në 2009 dhe 2010 kemi intervenuar në shtëpitë me rëndësi të veçantë. Si rrugë, “Marlin Barleti” me shtëpitë karakteristike pavarësisht që janë pronë individuale është dashur të ketë ndërhyrje nga komuna dhe institucionet qendrore. Për fatin e keq të qytetarëve të Prizrenit ne e kemi një kryetar komune të dënuar për krim të organizuar. Këtu përgjegjësi nuk jepet, nuk pres nga ky kryetar të jap dorëheqje. Faji po tentohet të mbetet jetim, por faji ka adresa. Adresa e vetme është kuvendi komunal për këtë tragjedi. Nëse nuk intervenohet tragjedia e para dy dite mund të përsëritet shumë shpejtë”.