Anëtari i Kryesisë së Aleancës për Ardhmërinë e Kosovës (AAK), Anton Berisha, ka theksuar se shoqëria kosovare është në një depresion psikologjik.
Ai në rrjetin social Facebook ka shkruar se sot shoqëria kosovare jeton një situatë në të cilën askush nuk lëvizë, ngase sipas tij, besimi ka humbur në dy gjërat më të rëndësishme në një shoqëri: besimi në drejtësi dhe në ndershmëri.
“Sot, gati të gjithë janë dorëzuar para kësaj situate dhe janë reduktuar në veten e tyre. Megjithatë, ne nuk guxojmë të shndërrohemi në popull të pashpresë për të ardhmen, ne nuk guxojmë që shqiptari i Kosovës të dorëzohet para orekseve të fqinjëve tanë dhe kontekstit evropian e botëror që nuk është në ditët më të mira për ne”, ka thënë Berisha.
Ai ka theksuar se për ta kaluar këtë krizë, duhet të ndërmerren hapa konkretë e të guximshëm, “duke respektuar veten tonë dhe duke besuar që drejtësia shtetërore por edhe sociale është e mundur”.
“Këtë, nuk mund ta bëjë pushteti aktual, këtë nuk mund ta bëj as opozita edhe sikur nesër të vij në pushtet. Këtë mund ta bëjmë së bashku, duke krijuar një qeveri të përbashkët, nuk është më rëndësi se si do ta emëronim, por në thelb duhet të këtë shpëtimin”, ka theksuar Berisha.
Ai ka thënë se kjo qeveri duhet që brenda një afati gjashtë mujor të përmbyll temat e rënda nëpër të cilat është duke kaluar shteti i Kosovës.
“Po ashtu kjo qeveri duhet që të ndërtojë një plan së paku afatmesëm, që do të bind edhe popullin por edhe partnerët ndërkombëtar se ka shpresë për të jetuar në këtë vend dhe ka një shtet me të cilin është i mundur partneriteti”, ka shkruar Berisha.