Ekipi italian, Monza, ka shkruar historinë në futbollin italian, teksa është inkuadruar në Serie A për herë të parë në historinë e tyre.
E themeluar në vitin 1912, Monza gjithmonë ka garuar në kategoritë më të ulëta të futbollit në Itali, por që nga viti 2018 është forcuar si skuadër.
Mbrëmjen e së dielës ata arritën të triumfojnë në finalen e fazës “Play-off” ndaj Pisa-s me rezultat 4:3 pas vazhdimeve, pasi që koha e rregullt përfundoi me shifrat 2:1 në favor të kundërshtarëve.
Ndeshja pra shkoi në vazhdime, pasi që takimi i parë kishte përfunduar me rezultat 2:1 në të mirë të Monza-s.
Kujtojmë që Monza është forcuar si skuadër që nga viti 2018, kur ish-kryeministri i Italisë, Silvio Berlusconi dhe Adriano Galliani vendosën që të investojnë në klub.
/Albanianpost.com