18 C
Prizren
E diel, 31 Gusht, 2025

Brovina: Nëse Blloku ka zgjidhje, do ta thërrasë seancën

FloraBrovina14-08Pa pasur ndonjë marrëveshje mes dy blloqeve politike, kryesuesja e Kuvendit, Flora Brovina, nuk e ka ndërmend të thërras seancë.

Brovina thotë se nuk i ka marrë ende konkluzionet e debatit të Bllokut, por nëse ata kanë zgjidhje, do ta thërras seancën për 24 orë. Ndërkohë, kreu i LDK-së, Isa Mustafa ka thënë se Gjykata Kushtetuese është e udhës të sqarojë sesi mund të zbatohet vendimi i saj, në kushtet kur PDK nuk ka përkrahjen e shumicës në Kuvend.

Kryesuesja e Kuvendit Flora Brovina nuk e ka ndjekur seancën e djeshme të thirrur nga Blloku LDK-AAK-Nisma dhe Vetëvendosje, e të cilën e udhëhoqi deputetja më e re, Teuta Rugova. Për shkak të obligimeve familjare, Brovina tha se nuk e ka ndjekur këtë seancë, por gjithsesi ka një mendim për debatin e zhvilluar aty.

“Ata e bënë kërkesën, për çka? Për një debat që e dëgjuam dhe e kemi dëgjuar gjithherë. Kurrfarë debati. Në rend të ditës seanca konstituive nuk e ka debatin, sepse është në përfundim të seancës, është pika e tretë, nuk ka pikë shtesë”, tha Brovina.

Brovina tha se ende nuk i ka marrë me shkrim konkluzionet që dolën nga ky debat i deputetëve të Bllokut.

“Në qoftë se kanë një zgjidhje unë për 24 orë e thërras seancën”, tha Brovina.

Sidoqoftë, deputetja më e vjetër e Kuvendit thotë se për ta thirrur seancën, duhet të ketë ndonjë rezultat sa i përket marrëveshjes mes dy blloqeve politike.

“Të shohim, mund edhe ta thërras. Varet se a do të kemi një rezultat apo jo, a kemi temë çka të bisedojmë, pra ta zgjidhim këtë problem”, tha Brovina për Radio Kosovën.

Ndërkohë, kreu i LDK-së, Isa Mustafa në rrjetit social Facebook ka thënë janë dy zgjidhje, PDK-ja të tërhiqet nga e drejta që ia ka dhënë Gjykata Kushtetuese për kryeparlamentarin, ose Gjykata Kushtetuese të sqarojë sesi mund të zbatohet vendimi i saj, në kushtet kur PDK nuk ka përkrahjen e shumicës në Kuvend.

Mustafa ka thënë se konstituimi i Kuvendit dhe zgjedhja e Qeverisë nuk kanë nevojë të mbesin peng e këmbënguljes së PDK-së me partnerët e koalicionit, që përbëjnë 30% të votave të elektoratit për ta mbajtur me çdo kusht pushtetin.

Kreu i LDK-së ka theksuar se organet që marrin vendime është e udhës të sqarojnë sesi këto vendime duhet të zbatohen në mënyrë që ato të bëhen efektive dhe të mos e bllokojnë jetën demokratike të vendit./RTK/

Më Shumë

Në prag të nisjes së shkollës nxënësit nisin përgatitjet, Kukësi shpesh zgjedh Prizrenin për blerje

Pasi hap njësinë e tij tregtare, Arben Istrefi, njëri prej tregtarëve në Kukës, rreshton dhe synon të shesë artikujt e parë në këtë periudhë...

22 lidhje ilegale uji shkyçen nga rrjeti në rajonin e Prizrenit

Ekipet e KRU “Hidroregjioni Jugor” SHA kanë shkyçur 22 lidhje ilegale të ujit gjatë javës së fundit në rajonin e Prizrenit dhe komunat përreth....

Lajmet e Fundit