Në kuadër të takimeve të drejtpërdrejta me banorët e vendbanimeve të Malishevës,kryetari i Malishevës, Ragip Begaj, mbrëmë është takuar me banorët e fshatit Bardh.Qëllimi i këtij takimi ka qenë informimi rreth etheve hemorragjike, largimi i mbeturinave, si dhe për të dëgjuar për hallet dhe problemet që kanë banorët e këtij fshati.
Banorët e këtij fshati ka ngritur shqetësimin se djegia e gomave në furrat e gëlqeres, është shqetësimi më i madh i tyre.
Fillimisht kryetari Begaj, ka kërkuar nga banorët e Bardhit, që të kenë kujdes të shtuar, në mënyrë që të zvogëlojnë mundësinë e infektimit nga ethet hemorragjike, duke i ikur kontaktit me rriqrat, ndërsa kërkoi që edhe Bardhi, sikur edhe vendet tjera, ti bashkohen aksionit për largimin e mbeturinave.
Ndërsa drejtori i Drejtorisë së Shëndetësisë,Hajdin Berisha, i njoftoi banorët, me masat që është duke marrë Komuna e Malishevës, për luftimin dhe parandalimin e etheve hemorragjike “krime kongo”, duke kërkuar në të njëjtën kohë, edhe kujdes të shtuar nga vet banorët.
“Brenda kësaj jave presim përgjigje përfundimtare për formën e spërkatjes, masive apo selektive, por sidoqoftë, Komuna e Malishevës dhe shërbimi shëndetësor, do të jenë 24 orë në shërbim të banorëve, andaj, në asnjë mënyrë, nëse thumboheni nga rriqrat, mos i largoni, por kërkoni ndihën e mjekut”, ka bërë thirrje Berisha.
Nga ana tjetër, banorët e fshatit Bardh, shprehën shqetësimin e tyre, për ndotjen e ambientit nga furrat e gëlqeres, pasi në ato furra, viteve të fundit, po përdoren gomat e vjetra për djegie dhe rrjedhimisht, janë duke e ndotur ambientin në shkallë të lartë, për çka kanë kërkuar marrjen e masave për eliminimin e kësaj dukurie. Tradicionalisht, banorët e kësaj, kanë jetuar nga përfitimi i gëlqeres, si burim i jetës për ta.
Probleme tjera, me të cilat përballen banorët e këtij fshati, janë edhe kanalizimi, nevoja për shtrimin e disa rrugëve dhe meremetimin apo ndërtimin e shkollës, pasi objekti aktual, edhe pse i ndërtuar viteve të fundit, është punuar jo mirë dhe jashtë standardeve, përderisa rrezikohen edhe nxënësit nga rënia e tavanit. Të rinjtë e këtij fshati kërkuan ndërtimin e një fushe sporti, e cila do të shërbente për nevojat e tyre dhe të shkollës.
“Angazhimi ynë për realizimin e kërkesave të juaja nuk do të mungoj dhe ne do ti shytojmë të gjitha mundësitë, për realizimin e kërkesave të juaja, përderisa një rrugë, brenda pak ditëve do të shtrohet, sikur edhe një pjesë e kanalizimit”, tha mes tjerash Begaj.