Komisioni parlamentar e vë para përgjegjësisë ministrin e MBZHR-së
Opozita dyshon për keqpërdorime dhe korrupsion milionësh
Deputeti Lahi Brahimaj tha se ministri Krasniqi në mbledhjen komisionit e ka konfirmuar se janë zënë dy keqpërdorues të subvencioneve dhe të granteve bujqësore. Brahimaj thotë se problemi qëndron nga mosguximi i fermerëve që të denoncojnë me emër e mbiemër zyrtarët e ministrisë, nga frika se pas këtyre denocimeve ata do të futen në listat e zeza edhe për 3-5 vite të tjera, duke mos pasur mundësi që të përfitojnë grante.
Një shkrim i botuar javë më parë në të përditshmen “Kosova Sot”, që fliste për keqpërdorimet e fondeve të fermerëve nga ana e zyrtarëve të Ministrisë së Bujqësisë dhe që më pas si çështje është ngritur në Komisionin për bujqësi nga anëtarët e komisionit nga radhët e opozitës, sikur i ka zgjuar nga gjumi drejtuesit e kësaj ministrie.
Siç kanë njoftuar 3 anëtarët e komisionit nga radhët e opozitës, në takimin e fundit të këtij komisioni të mërkurën ka qenë ministri i Bujqësisë, Pylltarisë dhe Zhvillimit Rural, Memli Krasnqi, që i ka njoftuar anëtarët e komisioni se zyrtarët e tyre kanë zbuluar dy raste të keqpërdorimit të granteve nga ana e fermerëve mashtrues. Përfaqësuesit e opozitës kanë akuzuar drejtuesit e Ministrisë së Bujqësisë dhe Pylltarisë dhe Agjensionin për Ndarjen e Granteve Bujqësore se po i keqpërdorin fondet për fermerët kosovarë. Sipas tyre, nga fondet e Ministrisë së Bujqësisë po përfitojnë më shumë fermerë matrapazë dhe mashtrues sesa fermerët e vërtetë…/kosova sot/