Festivali Ndërkombëtar i Filmit Artistik në Durrës bashkoi në edicionin e gjashtë të tij krijues të njohur shqiptarë dhe italianë, regjisorë, aktorë e studentë të arteve. Festivali këtë vjeshtë ishte një sfidë nga ana organizative për shkak të angazhimeve dhe ndryshimeve të shumta në qarqet artistike.
Festivali këtë vjeshtë ishte një sfidë nga ana organizative për shkak të angazhimve dhe ndryshimeve të shumta në qarqet artistike. Aktori muzikant Gabrielle Rendina, i pranishëm në prezantimin e filmit “L’intrepido” ku luan edhe vetë,, thotë se ishte kënaqësi e madhe të bashkëpunoje me regjisorin e mirënjohur Giani Amelio.
“Kjo është hera e dytë që vij në Shqipëri – thotë Rendina – dhe përsëri është me xhirime të një filmi të ri artistik të regjisorit të njohur italian Xhani Amelio. Skenat e fundt të filmit janë xhiruar në Shqipëri, përkatësisht në Burrel dhe në Tiranë, tregues i një lidhjeje të hershme të Amelios për këtë vend. Nga viti 1993 ai xhiroi filmin “Lamerica”, kushtuar Italisë, Shqipërisë dhe emigracionit në përgjithësi”.
Gjatë festivalit u dhanë tituj të karrierës për regjisorin Piro Milkani dhe aktorin Lutfi Hoxha. Ata u nderua me “Gladiatorin e karrierës”, Regjisori Eno Milkani thotë se prodhimi kinematografik shqiptar është shumë i vogël, sepse mungojnë mbështetja dhe financimet. Drejtore e Institutit Italian të Kulturës, Fulvia Veneziani, thotë se organizatorët shqiptarë këmbëngulën që ta cojnë përpara këtë projekt.
“Jemi në vitin e tretë që Instituti Italian i Kulturës merr pjesë në këtë festival me qëllimin që t’i tregojë publikut arritjet e kinemasë gjatë një viti. Kinemaja historike dhe ajo bashkëkohore ndihmojnë shumë për të kuptuar shpirtin e popujve”, thotë zonja Veneciani, transmeton VOA.
Festivali u zhvillua edhe këtë vit në salën e Teatrit “Aleksandër Moisiu”, sepse qyteti bregdetar, i dyti në vend për nga madhësia dhe rëndësia, nuk ka ende asnjë sallë kinemaje, ndonëse ndër vite ka nxjerrë një numër të madh aktorësh, regjisorësh dhe artistësh të filmit artistik shqiptar.