Shtetasi i Shqipërisë, Jetmir Ajazi, i akuzuar se deshi t’i jepte ryshfet një polici të Kosovës për të mos i shqiptuar një gjobë për kundërvajtje në trafik, ka dalë para Gjykatës në Prizren.
Në seancën e sotme është lexuar aktakuza nga prokurori Metush Biraj.
I akuzuari në konsultim me mbrojtësin e tij, avokatin Avni Berisha, e pranoi fajësinë për veprën penale – dhënia e ryshfetit, raporton kallxo.com.
Gjyqtari i rastit, Skender Çoçaj, duke marrë parasysh pranimin e fajësisë nga i akuzuari Jetmir Ajazi, i shqiptoi dënimin me gjobë në shumën prej 500 eurosh.
Po ashtu, gjyqtari e obligoi të akuzuarin që edhe në Fondin e viktimave të paguajë shumën prej 50 euro.
Rasti për të cilin u gjykua shtetasi i Shqipërisë ka ndodhur këtë të shtunë, në Prizren.
Sipas aktakuzës, i akuzuari kishte tentuar t’i jepte shumën prej 2.000 lekësh (15 euro) zyrtarit policor në Prizren me qëllim që i njëjti të mos i shqiptojë një gjobë për kundërvajtje.
Aktakuza e Prokurorisë së Prizrenit thotë se Jetmir Ajazi i ishte drejtuar policit me fjalët: “Leje o shef mos më vë gjobë, po ta rregullojmë disi këtë punë”.