Gjykata Speciale e cila kaloi para disa ditësh nga ana e Kuvendit të Kosovës, mund t’i dëshpëroj shumë ata që insistuan me çdo kush formimin e saj. Burime ndërkombëtare i kanë thënë Gazetës Blic se edhe kjo Gjykatë ka rrezik të madh që të funksioj ngjashëm sikurse misioni i EULEX-it.
“Do të kapen disa peshq të mëdhenj, por nuk pritet shumë efikasitet as nga kjo Gjykatë. Do të funksionoj pak a shumë sikurse EULEX-i”, ka thënë ky burim, duke mos dashur të hyj në emra se kush mund të jenë të akuzuarit kryesor.
Sipas këtij burimi, ekziston rreziku që edhe Gjykata Speciale, sikurse EULEX-i të influencohet nga njerëz të fuqishëm, dhe të bjerë nën ndikimin e interesave politike.
“Politika mund të interferoj edhe tek kjo gjykatë, sidomos nëse do të thirren në sigurinë dhe stabilitetin në Kosovë. Ky është rreziku më i madh, që kjo gjykatë të shndërrohet në një EULEX, i cili doli të jetë një mision i dështuar”, tha ky burim.
Ndërkohë, gazetari Milaim Zeka ka publikuar emrat e shumë prej politikanëve të lartë të Kosovës, që do të jenë të akuzuar nga kjo Gjykatë.
Ai në listën e tij ka përfshirë edhe njerëzit më të fuqishëm në Kosovë, si Hashim Thaçi, Xhavit Haliti, Azem Syla, Kadri Veseli, Daut Haradinaj, Fatmir Limaj, Bislim Zyrapi, Blerim Kuçi e të tjerë.
Madje, sipas tij, do të hetohen edhe rastet e vrasjeve të pas luftës, si ai i Xhemajl Mustafës e zyrtarëve tjerë të vrarë të LDK-së.
Gjykata Speciale e Kosovës u miratua javën e kaluar nga ana e Kuvendit të Kosovës me 82 vota.
Mediet sot kanë raportuar se lideri i PDK-së, Hashim Thaçi është njeriu kryesor që do të merret me negocimin e marrëveshjeve ndërkombëtare për themelimin e Gjykatës Speciale.
Në cilësinë e Ministrit të Punëve të Jashtme, Thaçi do të negociojë marrëveshjen me Holandën, ku pritet të jetë një pjesë e objektit të Gjykatës Speciale./ Gazeta Blic