Teatri Kombëtar i Kosovës ka njoftuar se tashmë ka hapur konkursin për dramë kombëtare “Katarina Josipi”, dhe se në ky konkurs është i hapur për të gjithë krijuesit shqiptarë që shkruajnë drama.
Sipas këtij konkursi tashmë janë publikuar edhe kriteret që duhet tu nënshtrohen krijuesit sikurse që është edhe ajo që një autor mund të sjell më së shumti dy drama për shqyrtim.
“Dramat që konkurrojnë në këtë konkurs duhet të jenë jo më të shkurtra se 50 minuta; Dramat e të gjitha zhanreve do të merren në shqyrtim;Tema dhe as numri i personazheve nuk janë të limituara, Dramat e papërfunduara apo sinopsiset nuk do të merren fare në shqyrtim; Dramat që sillen në këtë konkurs duhet të jenë origjinale, të shkruara mbas vitit 2000 dhe duhet të jenë të painskenuara më përpara;”, thuhet mes të tjerash.
Ndërkohë tri dramat më të mira shpërblehen me tri çmime, përkatësisht: çmimi i parë 3,600 euro, çmimi i dytë me 2,400 euro dhe çmimi i tretë me 1,200 euro.
“Drama që fiton vendin e parë, konsiderohet si dramë potenciale për t‘u inskenuar në njërin nga sezonat e ardhshëm në TKK kurse tri dramat fituese botohen në një edicion special”, thuhet në këtë njoftim.
Krejt në fund bëhet e ditur se dramat duhet të dërgohen në adresë të Teatrit Kombëtar të Kosovës (Teatri Kombëtar i Kosovës, Sheshi Nëna Tereze, nr.21, 10000 – Prishtinë, Kosovë) ose përmes postës elektronike: [email protected]. Konkursi mbyllet më 25 dhjetor të këtij viti kurse mbështetet nga Ministria për Kulturë, Rini dhe Sporte.