Kryetari i Aleancës për Ardhmërinë e Kosovës, Ramush Haradinaj, pas një takimi të mbajtur sot me partnerët e koalicionit, ka dalë edhe një herë kundër zgjedhjeve të jashtëzakonshme.
Sipas tij, vendi nuk mund të shkojë në zgjedhje për shkak të tekeve të një partie të vetme.
“PDK mund të organizojë zgjedhje vetëm për vete nëse do, sepse shumica parlamentare e përbërë prej 64 deputetëve ekziston”, ka thënë Haradinaj, shkruan Express.
Ai është shprehur edhe një herë shumë i shqetësuar për humbjen e kohës që po ndodhë sipas tij, për shkak të tekeve të PDK-së, ndërsa ka thënë se kanë biseduar për planin e veprimit gjatë seancës së ardhshme të 2 tetorit.
Sipas Haradinajt, nuk ka më kuptim që PDK’ja të vijë në seancën parlamentare me kandidaturë, qoftë Arsim Bajramin apo këdo tjetër.
Ndërsa, Ismet Beqiri nga Lidhja Demokratike e Kosovës ka thënë se nuk ekziston asnjë instancë qe mund t’i thërrasë zgjedhjet e jashtëzakonshme nëse nuk e kanë shumicën parlamentare. Ai ka thënë se zgjedhjet nuk janë zgjidhje sepse zgjidhja është në parlament.
Sipas tij, ideja për të shkuar në zgjedhje është një lloj shantazhi që po e bën PDK’ja me qëllim që ta frikësojë dhe ta zmbrapsë bllokun.
Beqiri ka folur edhe për ofertën që publikisht PDK ia ja bërë partisë së tij, duke thënë se PDK nuk është në pozitë të bëjë oferta të asnjë lloji. Kjo sipas tij është edhe një tendencë për të blerë kohë, por që nuk do të pijë ujë as kësaj radhe.