Sot në Galerinë e Arteve të Kosovës do të hapet ekspozita e skulptorit dhe artistit të famshëm britanik, Henry Moore. I njohur për skulpturat e tij si vepra arti publike nëpër botë, në galeri do të eksponohen grafika dhe skulptura të përzgjedhura, që janë koleksion i British Council, të cilat janë në turne rreth botës.
Ekspozita do të përfshijë vepra të përzgjedhura të artistit të njohur britanik, i cili tri dekada më parë ia kishte dhuruar Koleksionit të Këshillit Britanik.
Gjatë kësaj ekspozite e cila do të fillojë në ora 19:00, do të prezentohen 80 grafika të cilat janë përmbledhur në tetë grupe të prodhuara që nga viti 1949 deri në 1983.
Si pjesë e kësaj ekspozite do të përfshihen një nga temat më të njohura të Moore, ‘Nëna dhe Fëmija’ dhe ‘Figurat e gjysmështrira’, pesë skulptura dhe një model makete të së njëjtës periudhë.