Kosova është i vetmi vend ku Gjykata Kushtetuese nuk i përfillë vendimet e institucioneve tjera. Kjo Gjykatë nuk po e liron objektin në qendër të Prishtinës i dedikuar për Avokatin e Popullit. Ndërkohë, këtij institucioni, Shteti ia ka ndërtuar objektin në periferi të Prishtinës, në lagjen Hajvali, i njohur si “Pallati i Drejtësisë”. Atje, ndërtesa është e gatshme, por udhëheqja e Kushtetueses, pa dhënë ndonjë arsyetim, s’po akomodohet në objektin e saj.
Avokati i Popullit, Hilmi Jashari, ka treguar se paguajnë mbi pesë mijë euro qera, ndërkohë, objekti i dedikuar për këtë institucion mbetet në shfrytëzim nga Gjykata Kushtetuese.
“Akomodimi i institucioneve publike është kompetencë e Ministrisë së Administratës Publike. Është një vendim i nxjerr në vitin 2012, i cili e obligon Gjykatën Kushtetuese për të dalë në Pallatin e Drejtësisë. Ndërsa, institucionin e Avokatit të Popullit, prej këtij objekti që është privat, duhet të vendoset në objektin ku është aktualisht Gjykata Kushtetuese. Ky vendim ende nuk është zbatuar”, ka thënë Avokati i Popullit Hilmi Jashari në një intervistë për Gazetën Express.
Jashari ka treguar se i është drejtuar edhe Kryeministrit për këtë problem por ende s’ka asnjë lëvizje për lirimin e objektit.
“Për këta katër muaj kemi paguar më tepër se 20 mijë euro qera”, ka shtuar ai.
Avokati Jashari ka thënë se ka vend për hetime nga Prokuroria e Shtetit për shkak se në mënyrë të paarsyeshme po detyrohen të paguajnë qera.
“Çdo para e taksapaguesve e harxhuar në mënyrë jo të drejtë bartë përgjegjësi në vete”, ka shtuar ai.
Në këtë intervistë Avokati i Popullit flet edhe për sistemin e drejtësisë; drejtësinë selektive; kompetencat e reja të avokatit të popullit; të drejtat e LGBT’së; shaminë nëpër shkolla etj. /Gazeta Express