Shfaqja “Edipi-Mbret” e Teatrit Kombëtar të Shqipërisë, me regji të Ilir Bokshit dhe skenografi të Petrit Bakallit, ka fituar çmimin e publikut në festivalin e dytë mbarëkombëtar të Teatrove në Qytetin e Tetovës. Nga votat e mbledhura nga spektatorët, çmimi iu dha pikërisht kësaj vepre të Shekspirit.
“Në bazë të rezultateve paraprake dhe komisionit që ka ofruar rezultatin e votimit të publikut, shfaqja më e mirë e festivalit ndërkombëtarë të Teatrit të Tetovës është ajo që është bërë në bashkëprodhim mes Kosovës dhe Shqipërisë, “Edipi-Mbret”. Dhe ne i përgëzojmë të gjithë ata që morën pjesë në këtë festival dhe që na nderuan me prezencën e tyre”, tha Valmir Aziri, drejtor i Teatrit të Tetovës për televizionin Alsat-M.
Festivali i sivjetmë, për dallim nga festivali i parë, megjithë fondet e pamjaftueshme për realizimin e tij, pati një jehonë më të madhe, falë përzgjedhjes së shfaqjeve. Për pesë net me radhë publiku nuk i la bosh kolltukët e sallës së Teatrit.
“Publiku tetovar i priti në mënyrë të mahnitshme gjashtë shfaqjet që u dhanë në Teatrin e Tetovës, të gjitha pritshmëritë që kishte festivali dhe drejtoria u përmbushën”, u shpreh Aziri.