Gjykimi ndaj inkasantit të ndërmarrjes ‘Hidroregjioni Jugor”, Hafir Gallopeni, i akuzuar për përvetësim në detyrë, do të fillojë me 12 prill, pasi që të njëjtit i është refuzuar kërkesa për hudhjen e aktakuzës.
Të premten, në Gjykatën Themelore në Prizren, është mbajtur shqyrtimi i dytë në këtë çështje penale, ku mbrojtësi i të akuzuarit, avokati Bashkim Nevzati ka kërkuar që aktakuza të hudhet poshtë në mungesë të provave.
Prokurorja e rastit, Ervehe Gashi, ka kërkuar që të refuzohet kërkesa për hudhje të aktakuzës sepse e njëjta është e bazuar në prova të pranueshme.
Kryetarja e trupit gjykues, Ajser Skenderi, ka refuzuar kërkesën e mbrojtjes për hudhje të aktakuzës dhe pasi që mbrojtja ka hequr dorë nga ankesa, ka caktuar fillimin e gjykimit për 12 prill, në ora 09:30.
I akuzuari dyshohet se duke punuar si inkasantë në ujësjellësin “Hidroregjioni Jugor” në Prizren, ka përvetësuar para, në shumë prej rreth 20 mijë euro.
Gjykimi zhvillohet në bazë të aktakuzës së Prokurorisë Themelore në Prizren, të ngritur fillimisht ndaj Hafir Gallopenit, Faik Berishës, Isen Ramanajt dhe Dardan Gashit.
Mirëpo, të akuzuarit Faik Berisha, Isen Ramanaj dhe Dardan Gashi, pas ngritjes së aktakuzës, kanë arritur marrëveshje mbi pranimin e fajësisë, me organin e akuzës, ndërsa i akuzuari Hafir Gallopeni, nuk ka arritur një marrëveshje të tillë, andaj për të njëjtin procedura vazhdon./betimiperdrejtesi/