Konsulli i Kosovës në Bullgari, Lulzim Rifaj ka thënë se një “person me mjekërr” i ardhur nga Austria, ka nisur përleshjen e ndodhur dje në Vranishtë të Dragashit.
Një protestë e organitzuar dje në Vranishtë për kundërshtimin e ndërtimit të një hidrocentrali në këtë fshat, eskaloi në dhunë. Protestuesit kundërshtonin ndërtimin e këtij hidrocentrali, me pretendimet se toka ku po ndërtohet hidrocentrali është e uzurpuar.
E pikërisht në ditën e protestës, është parë me një mjet të rëndë në duar Konsulli i Kosovës në Bullgari, Lulzim Rifaj, i cili besohet të jetë edhe aksionar në kompaninë që po e ndërton mini-hidrocentralin përgjatë lumit Brod, në Vranishtë.
Rifaj ka thënë për Insajderin se nuk ka qenë i përfshirë në protestë, por se rastësisht e mbante në duar një mjet të rëndë. Konsulli ka thënë se personi që shkaktoi incidentin është një person me mjekërr.
“Ai ka mbajtur fjalim për protestuesit dhe ka thirrur Allahu Ekberr. Ai ka sulmuar policinë dhe pastaj është larguar”, ka thënë Konsulli i Kosovës në Bullgari.
“Njëfarë Vojvoda, i cili ka ardhur prej Austrisë… është me mjekër”, ka thënë Rifaj.
E Policia e Kosovës ka konfirmuar për Insajderin se njëri prej protestuesve është në kërkim nga Policia, por duke mos dhënë detaje të tjera. /Insajderi.com