Jo vetëm administrata osmane i është përmbajtur këtij koncepti, kur myslimanët i ka trajtuar si “turq”, pavarësisht kombësisë reale të tyre. Këtë ekuacion të rremë e kanë zbatuar për shumë kohë, deri në shekullin XX edhe zyra e kancelari perëndimore.
“Turq luftojnë kundër turqve” është nxjerrë nga një relacion nga Himara, bërë nga mitropoliti i Durrësit, Simeon Lascari, më 12 mars 1661. Ky mes tjerash flet edhe për dy fshatra, Progonat e Dukat, të cilët në atë kohë ishin ngritur kundër Portës së Lartë. “Dukati…”, shkruan mitropoliti, “është një fshat me një mijë banorë, të cilët janë turq kryengritës (si trova una terra delta Ducades, fa anime due mille, e qui sono anche Turchi ribelli)”. Gjithashtu, vazhdon ai, “ndodhet aty edhe fshati Progonat që bën gjithsej dy mijë banorë edhe ata janë turq që luftojnë kundër turqve (terra detta progonates, fa anime due mille turchi…che combattono centro Turchi)”.