Aktori nga Kosova, Kushtrim Hoxha, i cili ka kohë që jeton në Amerikë, në San Diego, në “Old Globe Theatre” tanimë është përzgjedhur edhe në mesin e aktorëve që do të luajë në “The Two Gentlemen of Verona” të Shekspirit.
Vepra e cila do të inskenohet në 10 gusht dhe në data tjera gjatë këtij muaji dhe muajit shtator, ka regjisor Mark Lamos, fitues i Tony Awards. Një nga komeditë më të arritura të gjeniut Shekspir sjell dy shokë të ngushtë në një dashuri të përbashkët, Silvian. Siç transmeton kultplus, shfaqja nis edhe sezonin vjeshtor të teatrit dhe zë pjesë në kuadër të festivalit që i kushtohet në përgjithësi figurës së Shekspirit.
Ky rol për Kushtrim Hoxhën vjen pas “Othellos” dhe roleve tjera që tanimë ai i ka luajtur e që rrjedhin nga krijimet e Shekspirit. Në shkrimet botërore rreth “Othello” Kushtrim Hoxha përshkruhet si një nga aktorët më ekspersivë të kohës së tij dhe të këtij teatri në të cilin konkurojnë aktorë nga e mbarë bota. Hoxha para disa vitesh ishte zgjedhur si aktor në mesin e mijëra aplikantëve në konkurs të hapur.
Hoxha në “The Two Gentlemen of Verona”, komedinë e famshme të vitit 1589 vjen me rolin e Panthinos, shërbëtorit të Antonios, ky babai i Proteusit, një nga personazhet kryesore, bashkë me Valentinin dhe Silvian.