Liderët politikë kanë shpeshtuar kohëve të fundit vizitat në Prizren. Kryetari i degës së LDKsë, Haxhi Avdyli, për “Kosova Sot” shprehet se ardhja e liderëve shpesh në Prizren veçanërisht e Kadri Veselit tregon që dega e tyre në Prizren i ka punët keq dhe zhgënjimi i qytetarëve me PDK-në është i madh. “Projektet e proklamuara, memorandumet false të nënshkruara midis ministrave dhe të dënuarit Ramadan Muja në disa raste edhe të paparashikuara me buxhet, janë në vazhdën e tentimit për të mashtruar qytetarin e Prizrenit”, ka thënë ai.
Ripërsëritje e premtimeve boshe Zyra e PDK-së thekson se jo vetëm përfaqësues e liderë të PDK-së që vijnë Prizren, por vijnë edhe të tjerët. “Jemi të vetëdijshëm se Prizreni është i këndshëm për të gjithë”, ka shkruar zyra e PDK-së. Kurse Zafir Berisha, kandidat i NISMA-s për Prizrenin, shprehet për gazetën se ardhja e tyre ka të bëjë me fushatën elektorale.
“Disa prej tyre i ripërsërisin premtimet për vitet të tëra dhe asnjëherë nuk i realizojnë që i bie thjeshtë janë mashtrime të radhës”, është shprehur ai. Ilir Badedaj nga AAK-ja thekson se ardhja e liderëve e sidomos ata që kanë qeverisur nga 2007 në Prizren është pak e çuditshme. “Po i dëgjojmë bizneset ku për 10 vite asgjë nuk kanë bërë për ta, edhe pse kanë pasur premtime megalomane”, është shprehur ai.
Verë e nxehtë politike Vetë Zafir Berisha është i bindur se Nisma do të fitojë zgjedhjet. “Unë do të jem kryetar i Komunës së Prizrenit”, ka thënë ai. Tashmë kur jemi në këtë vit zgjedhor edhe zyrtarisht po shihet se në këtë qytet ka shumë vizita të liderëve, gjë që flet për një verë të nxehtë në qytetin historik. Se si do të shkojnë gjërat se ku kush me kë do të hyjë në koalicion është herët të thuhet, porse të gjitha partitë synojnë ta marrin Prizrenin.
(Kosova Sot)